LAOAG CITY – Inbatad ni Dr. Alan Taylan, maysa nga Internal Medicine Doctor iti St. Camillus de Lellis Hospital ditoy siudad ti Laoag a manmano laeng a pasamak ti kaadda ti babai nga agpasngay ti nonuplets
Kuna na nga adda metten dagiti immuna a nagpasngay ti pito agingga iti walo a maladaga manipod iti nagduduma a pagilian ngem saan a nagbiag amin dagiti ubbing.
Inlawlawag na a narisgo ti agsikog iti nasursurok ngem maysa a maladaga gapu ta saanda a maipaayan ti naan-anay a nutrisyon, karaman ditoyen ti ina.
Patien ni Doctor Taylan a ti panagsikog ti nonuplet ket saan a matawid no di ket mabalin a mairana laeng a ti maysa a babai ket nakaro ti fertility na.
Reaksyon daytoy ni Doctor Taylan mainaig iti maysa a babai manipod iti Mali a nagpasngay iti nonuplet wenno siyam a maladaga nga iti agdama ket liman ti tawen dagiti ubbing ken nagbiag da amin.
Naamoan a dagiti nonuplets ket nakaburak da ti Guiness World Record para iti Most Children Delivered at a single Birth to Survive.
