LAOAG CITY – Ituloy ti Ukraine ti panagsinnukat dagiti hostage iti nagbaetanda ti Russia.
Segun ken ni Ukrainian military intelligence chief Kyrylo Budanov nga awan ti kinapudnona ti iwarwaras ti Russia a simmanod dagitoyen iti katulagan a maisayangkat kadagiti sumarsaruno nga aldaw.
Inbatadna nga awan ti rason tapno itantan ti panagsinnukatda kadagiti hostage a suldado nga innem a ribu dagiti nasugatan ken masaksakit.
Immuna iti daytoy, nagdanag ti Russia ti saan a pannakaituloy ti prisoners swap gapu kadagiti mapaspasamak a drone strike iti dua a pagilian.
Maipalagip nga adda ti maiyuswat a panagsarita ti dua a pagilian nga idauloan daytoy ti Estados Unidos tapno agsardengen ti sumurok tallo a tawenen a gubat.
