LAOAG CITY – Inpakaammo ni Mrs. Cherry Joy Garma, information officer iti Schools Division of Ilocos Norte a maipawil iti panagsolicit iti printing materials, kas kadagiti bond papers, ken ink para kadagiti panagiyemprenta ti modules.
Daytoy ket kalpasan ti management community meeting usar iti online.
Segun kenni Garma, daytoy ti maysa kadagiti pammilin ti regional director ti DepEd region 1 ken naipakaammo da kadagiti mangisursuro ditoy probinsya babaen ti Division Memorandum ni Dr. Joan Corpuz.
Inbatad na a nailanad pay iti nasao a memo a maiparit pay nga usaren dagiti mangisursuro dagiti bukod da a kuarta nga igatang kadagiti nasaio a materyales.
Kuna ni Garma a libre a maited kadagiti estudyante dagiti mausar para iti panaglukat ti klase intono Oktubre 5.
Kinumpirmaran na nga adda dagiti mangisursuro a nagipost iti facebook nga arig nga agdawdawat da ti donasyon para kadagiti masapulan da a banag a naidanun iti regional director.
Inlawlawag ni Garma a dagiti agbuluntaryo a mangted iti donasyon ket mabalin met nga awaten dagiti mangisursuro a saan ketdi nga agdawdawat da.
Innayon na nga awan pay ti naawat da a reklamo seknan kadagiti agsolicit a mangisursuro sipud naibaga kadakuada a maipawil ti agsolicit.
Adda ti narealign a pondo nga umabot iti 27 a milyon a pisos a mausar para iti panagadal dagiti estudyante ngem possible a saan nga umanay daytoy.
Para kenni Garma, ti panakaiyalud-od ti panaglukat ti klase manipud Agosto 24 a naipan iti Oktubre 5 adda pay ti oras da tapno maamuan dagiti mabalin pay a pagdur-asan dagiti maiyuswat a learning modalities.
