LAOAG CITY – Adda ti napintas nga impact na iti liderato ni Presidente Ferdinand Marcos Jr. no agsubli ti Pilipinas iti International Criminal Court (ICC).
Daytoy ti pammati ti maysa a Political Analyst a ni Professor Karl Lenin Benigno iti Northwestern University ditoy ciudad ti Laoag.
Inlawlawag na a no ikonsiderar ti agdama nga administrasyon nga agsubli ti Pilipinas iti International Criminal Body ket mangipakita a ti gobierno ni Presidente Marcos ket adda ti accountability na iti Human Rights abuses.
Kuna na a daytoy ket commitment a ti siasinno man ti naglabsing iti kalintegan dagiti tattao ket masapol a mapatawan ti pannusa ken maikkan ti hustisya dagiti biktima.
Maipalagip a nagikkat ti Pilipinas iti International Criminal Court kabayatan ti administrasyon ni dati a Presidente Rodrigo Duterte gapu iti pulitika no sadinno a saan nga immanamong ti dati a presidente nga agimbestigar ti International Criminal Court iti war on drugs ditoy pagilyan.
Nupay kasta, mailunglungalong iti agdama a masapol nga ikonsiderar ti agdama nga administrasyon ti panagsubli ti Pilipinas iti International Criminal Court.
Mainaig iti daytoy, no bilang ipalubos ti agdama nga administrasyon nga agsubli ti Pilipinas iti International Criminal Court ket saan a maliklikan nga adda ti agbalin nga epekto na iti relasyon ti pamilya Duterte ken pamilya Marcos kangrunaan na ket mabigbig dagitoy a napinget nga agkaalyado no maipapan iti pulitika.
Immunan nga inrakurak da Presidente Marcos ken ni Justice Secretary Jesus Crispin Remulla a seryoso a naan-anay a panangadal a naimbag ti posibilidad a panagsubli ti Pilipinas iti International Criminal Court.
