LAOAG CITY – Inlungalong ni Bacolod Rep. Alfredo Abelardo Benitez ti innem a bulan a panangitantan ti Barangay ken Sangguniang Kabataan Elections tapno mailatang ti pundo para iti panangsungbat iti krisis iti presio ti gasolina.
Inbatad ni Benitez, ti ₱13 bilyon agingga iti ₱14 bilyon a nailatang para iti eleksion ket mabalin nga usaren pay laeng para iti alisto a tulong kadagiti apektado a sektor.
Nakailanad iti gakat a naikeddeng ti eleksion inton Nobiembre 2 ngem agkasapulan daytoy ti baro a linteg no maitantan.
Nupay kasta, binigbigna a mabalin a sangoen ti gakat ti legal a karit gapu ta posible nga ideklarar ti Korte Suprema a mailabsing iti Konstitusion ti maminsan manen a panangitantan uray addaan ti “just cause.”
Tinalantan payen iti Kamara de Representantes dagiti addang tapno solbaren ti ngumatngato a presio ti gasolina idinto nga inpetteng ni Benitez ti kasapulan a saganaan ti nakarkaro a situasion gapu iti agtultuloy a tension iti Middle East.
