LAOAG CITY – Agtultuloy ti imbestigasyon ti PNP Bangui ken manarimaan iti panangduktal da iti katatao dagiti suspek a nagtakaw iti maysa nga hotel iti nasao nga ili.
Segun kenni Police Capt. Julius Basallo, hepe ti PNP Bangui, saan da nga ikkaten dagiti maibilang a mapagduduaan kalpasan ti napasamak a panagtatakaw.
Inbatad na nga umabot laeng iti walo agingga iti 10 a minotos iti panagserrek dagiti suspek.
Kuna ni Basallo a dua a suspek dagiti nakita da iti video footage ken possible adda dagiti kakadua da iti rumwar ti hotel.
Saan da pay laeng a maibaga no taga Bangui dagiti suspek.
Innayon ni Basallo a ti naudi a lokasyon ti Cellphone a natakaw ket nakadanun iti siudad ti Baguio.
Malaksid iti insidente, pinalagipan na ti publiko ti naiget a panagan-annad kangrunaan kadagiti manglokloko nga agtawag ken agdawat ti load ken dadduma pay.
