LAOAG CITY – Inlawlawag ni Mayor Eduard Quilala iti ili ti Currimao kalpasan a naipawil iti panagpasyar iti Pangil beach Resort.
Kuna na nga idi Hulyo 23, adda ti executive order a nangipawil iti panagpicnic tapno maliklikan ti adu a basura iti nasao a lugar.
Daytoy ket gapu ta kaaduan kadagiti nagturong iti beach resort ket naggapu iti sabali nga ili.
Inbatad ni Quilala nga idi kalman ket nakisarita dagiti barangay chairman iti Brgy. Pangil, Brgy. Victoria, Brgy. Poblacion Uno, ken Brgy. Gaang a saan kuma pay laeng a sumrek dagiti agpasyar kadagiti nasao a barangay.
Malaksid iti daytoy, kuna na a saan met a naipawil kadagiti guest dagiti naglukaten a resort iti nasao nga ili ti agturong iti baybay ngem responsable dagiti hotel a malimitaran nga agibelleng ti basura dagiti guest da.
Maipalagip nga adu a basura ti naakop dagiti opisyal ti barangay agraman dagiti residente iti Pangil Beach Resort gapu kadagiti nagpicnic.
