LAOAG CITY – Inbatad ti maysa a Counselling Professional a ni Ms. Divine Sevilla a dakkel ti epekto na iti panagug-ugali dagiti ubbing ti mabuybuya da a kina-bayolente kadagiti online games.
Kuna na a no naka-online game ket ti kangrunaan a gagem ket ti mangabak isut gapuna a nakaragragsak dagiti ubbing no mangab-abak da, ngem no maabak da ket ditoyen a maparnuay ti nagduduma nga emosyon da.
Inlawlawag ni Sevilla a dagiti mapaspasamak iti online game ket dakkel ti posibilidad na a maaramid iti pudno a biag dagiti ubbing gapu ta saanda a kayat nga adda dagiti mangpasakit, mangbully wenno mangabak kadakuada.
Innayon na a ti laeng kayat dagiti ubbing ket naragsak, ngem no adda ti pakasaktan da ket dakkel ti posibilidad na a no ania ti mabuybuya da ket isu ti agbalin nga opsyon da tapno agballigi iti nasao a sitwasyon.
Kabayatanna, inpaganetget ni Sevilla a dakkel ti akem dagiti nagannak tapno maliklik dagiti annak iti saan a nasayaat nga aramid a possible a maadaptar da kadagiti mabuybuya wenno online games.
Inrakurak na a napateg ti kanayun a panangmonitor dagiti nagannak kadagiti aktibidad dagiti annak ken nasken nga amwen dagiti napaspasamak kadakuada iti pagadalan.
Rakurak daytoy ni Sevilla kalpasan a nadakamat ni Department of Interior and Local Government Secretary Jonvic Remulla a mabalin a naimpluwensyaan ti estudyante a suspek iti pammaltog iti Ateneo de Zamboanga University iti online platform Roblox.
