LAOAG CITY – Paset ti naig-iget a panangipatungpal ti kapulisan ti seguridad ti pannakaisayangkat ti checkpoints kageddan ti umas-asideg nga eleksyon.
Daytoy ti inbatad ni PLt. Col Joemar Labiano, ti hepe ti PNP ditoy siudad ti Laoag kabayatan ti inyuswat a press conference ti Ilocos Norte Police Provincial Office (INPPO).
Inlawlawag ni Labiano a kangrunaan a nakaestablisaran kadagiti checkpoints ket iti asideg ti pagtaengan dagiti kandidato ditoy siudad.
Kuna na a daytoy ket gapu iti pannakaipangato ti kategorya ditoy siudad nu sadino a manipod iti yellow ket nagbalin nga orange category wenno maibilang nga areas of immediate concern.
Inbatad ni Labiano a kageddan ti checkpoints ket naiget ti pannakaipatungpal ti Oplan Sita.
Mainaig iti daytoy, inpakaammo ti hepe a ti panagcheckpoint tunggal adda dagiti panagtitipon ket inpatungpal na kas paset ti panagtalinaed ti linak ken talna ditoy siudad.
Kabayatanna, inlawlawag ni Labiano a ti Oplan Sita ken Comelec Checkpoint ket agduma a police intervention.
Kuna na a ti oplan sita ket para iti anti-criminality operations ken dita nga adda ti panagisuot ti kapulisan iti ballistic vest ken dadduma pay nga inisyu ti PNP a mausar kas proteksyon kabayatan ti police operations.
Mainaig iti daytoy, inbatad ni PMaj. Jephre Taccad, ti pannakangiwat iti INNPO a ti ballistic vest ket saan laeng a ti kapulisan ditoy probinsya dagiti agus-usar ngem ketdi iti intero a pagilian.
Inpakaammo na a ti kapulisan ket kanayun nga addaan ti tugot nga ID nu man pay saan a makita iti vest ti nagan da.
Inbatad na a mabalin a kiddawen nga ipakita ti pulis ti ID na kabayatan ti panagsita dagitoy.
Immapela pay daytoy kadagiti sumaruno nga agturay a nu adda ti pakabalinan na ket mairaman iti PNP a maipaayan ti pondo tapno adda amin ti usaren a vest pakairamanan ti hand held radio ti kapulisan ditoy probinsya gapu ta agkurkurang.
Maipalagip a makweskwestyunaran dagiti pulis nangruna iti babaen ti Team Fariñas gapu iti panagsita dagitoy ket panagcheckpoint da iti asideg ti pagtaengan dagiti ti nasao a pamilia.
Idi Mayo 5, nagwaras pay iti social media ti video manipod ken ni dati a congressman Rudy Fariñas mainaig iti panangkwestyunar na kadagiti pulis a nakasuot ti vest ken saan a makita ti nagan iti bado dagitoy.
Inpetteng dagiti pulis nga amin nga addang ti pulisya ket adda ti masursurot nga standard PNP operating procedure.
