LAOAG CITY – Adda ti panangbulod ti kwarta ti pagilian tapno saan a bumagsak ti ekonomiya ken nagduduma a proyekto.
Daytoy ti inbatad Mr. Orlino Mandac, maysa nga economist iti Mariano Marcos State University iti siudad ti Batac kalpasan nga umaboten iti P12.68-trillion ti utang ti Pilipinas.
Segun ken ni Mandac, saan a kayat a sawen ti panagutang ket mangipakita a marigrigat ti maysa a pagilian.
Inbatad na a mabalin a ti nautang a kwarta ket mausar para iti panagdur-as ti pagilian ken pangsuporta iti nagduduma a programa.
Nu pay kasta, kuna na a nu saan a mausar iti nasayaat ti mautang a kwarta ket awan ti pagbanagan daytoy ket ad-adda nga agrigat ti maysa a pagilian.
Immuna iti daytoy, inlawlawag na a ti sumagmamano kadagiti rason nu apay a makabulod ti kwarta ti gobierno ti sabali a pagilian ket gapu ta saan a makaumanay ti internal debt wenno ti mabalin a mautang kadagiti bangko ditoy pagilian.
Kabayatanna, kuna na a mabalin met a ngumato ti balor ti utang ti gobierno nu adda ti panagbaba ti sukat ti Philippine peso.
Inpakaammo ni Mandac a tapno mabayadan ti utang ket masurot ti dept to GDP ratio wenno ti revenue a mapaspastrek ti gobierno.
Innayun na a karaman pay daytoy iti debt servicing a naiyalokaran babaen iti budget ti gobierno national.
