LAOAG CITY – Inbatad ni Dr. Iver Ursudan Felix, taga Isabela ngem agdama nga agtrabtrabaho idiay Laos a naantisiparan ti gobierno iti nasao a pagilyan ti panagwaras ti covid-19.
Inlawlawag na nga idi naamoan ti Laos nga adda ti kaso ti covid-19 idiay China ket nangipatungpal da a dagus ti Precautionary measures babaen ti pannakaala ti temperatura dagiti estudyante kadagiti pagadalan ken panagusar ti alcohol.
Kuna a sakbay iti dayta ket adon dagiti taga Laos a napan iti nagduduma a pagilyan ngem idi nagsubli da ket naideretso da amin iti quarantine areas ken dimmalan da ti 14-day quarantine.
Innayon na nga adda pay ti naisagana nga ospital a paka-akomodaran amin dagiti possible nga infected ti virus.
Malaksid iti daytoy, apaman a naamoan ti gobierno ti Laos nga addan ti kaso ti covid-19 idiay Thailand ket pinaserraan da aminen a borders da kadagiti kaparanget da a pagilyan.
Gapu iti daytoy, 19 laeng a kaso ti covid-19 ti nairekord idiay Laos ken dagitoy ket agpapada nga aggapo iti ruwar ti pagilyan.
Manipod iti nasao a bilang ket piton dagiti naan-anay a nakarekobre isut gapuna a 12 laengen dagiti maob-obserbaran iti agdama.
Kabayatanna, inpakaammo ni Felix a kanayun met ti panagmonitor ti embahada ti Pilipinas idiay Laos kadakuada a Pilipino para iti ipaay da a tulong.
