LAOAG CITY – Kalikagum ni Ms. Joy Palencia iti Brgy. Saludares iti ili ti Dingras a maikkat ti naiyestablisar nga alad iti naituding a right of way iti solar da nga agkakabagyan.
Daytoy ket partikular iti inaladan ni Ms. Imelda Gatiwan, mismo a kasinsin ni Palencia.
Segun ken ni Palencia, nagudwa ti daga nga inpatawid ti lolo da ken dagitoy ket naited iti ama na ken ama ni Gatiwan.
Kuna ni Palencia a nagtutulaganda kada Gatiwan a maaddaan ti right of way a tallo a metro ngem saan a napagtutulagan a masapol a maaladan daytoy.
Gapu iti daytoy, inbatad na a rumbeng kuma a maikkat ti alad gapu ta arig a napupok ken awan ti pagdalanan da iti uneg ti solar da.
Kabayatanna, inpetteng ni Gatiwan nga inaladan na ti naited a right of way gapu ta maipagarup a saan a kayat iti biang ni Palencia a maibingayan ti daga dagiti ikit da nga awan ti agtawid.
Naamoan a lima nga agkakabsat ti kabuklan nga agbibingay iti daga ngem dagiti laengen ama ni Gatiwan ken Palencia ti naggudwa gapu ta awan ti agtawid kadagiti kabsatda nga addan iti sabali a biag.
Mainaig iti daytoy, inbatad ni Mr. Rosito Gamayon, ti Lupon Tagapayapa iti nasao a barangay a nabayagen a riri dagiti agkakabagyan ti nasao a banag.
Kuna na a gapu ta arig a saan a masolsolbar daytoy iti barangay ket posible a matratar lattan iti korte.
