LAOAG CITY – Inakusaran ti Panama ti gobierno ti Venezuela a nanglapped iti eroplano a nagluganan dagiti dati a lider ti Latin America a rumbeng koma a mangpaliiw iti Venezuela Presidential Elections.
Kinuna ni Panamanian President José Raúl Mulino iti online account na a pinagkedkedan ti Venezuela ti pammalubos ti eroplano nga agtayab no adda dagiti dati a lider a nakalugan.
Karaman kadagiti adda iti eroplano dagiti dati a presidente ti Mexico, Panama, Costa Rica ken Bolivia, no sadinno nga isuda amin ket kritiko ti agdama a gobierno ti Venezuela a nagkuna a mangnamnamada iti balligi ti oposision.
Naammuan a ni Venezuelan President Nicolás Maduro, ket kandidato para iti maikatlo nga agsasaruno a termino na kas Presidente, no sadinno a patien na a mangabak isuna babaen ti hook wenno babaen ti crook.
Nupay kasta idi napan a lawas, nangipaulog ti Venezuela iti bilin a manglapped iti panagbiahe iti ballasiw ti beddeng ti pagilian manipud idi Biernes, maysa a tignay a kunana a nairanta a mangsalaknib iti eleksion.
Kabayatanna, adda pay dagiti sayangguseng a maipagarup a laplapadan ti Venezuela ti iseserrek dagiti international observers.
