LAOAG CITY – Inpasigurado ti Department of Budget and Management (DBM) a saan a makaapektar iti panagdur-as ti ekonomia ti pagilian ti panang-veto ni Presidente Ferdinand Marcos Jr. iti pito kadagiti 10 a line items a nakaipalaon iti Unprogrammed Appropriations iti 2026 General Appropriations Act (GAA).
Inlawlawag ni Budget Secretary Rolando Toledo, daytoy ket gapu ta saan met a paset ti programmed appropriations dagiti nasao a line items ken ti kinapudnona ket awan pay ti pundona iti agdama.
Mapundoan laeng daytoy no adda ti nakita ken nabatbati a pundo ti gobierno.
Kuna ni Toledo a ti Pension ken Gratuity Fund para iti military ken uniformed personnel ket nakaipalaonen iti budget ti Department of the Interior and Local Government ken Department of National Defense.
Karaman kadagiti vineto ti Presidente a line items iti Unprogrammed Appropriations ket dagiti sumaganad:
Budgetary support to GOCCs (PhP6.8 billion);
Fiscal support iti CARS (Comprehensive Automotive Resurgence Strategy) program (PhP4.320 billion);
Insurance for government assets (P2 billion);
Public health emergency benefits a P6.7 billion;
Payments of PS requirements (PhP43,245,000) ken
Government Counterpart for Certain Foreign Assisted Projects – PHP35,769,481
