LAOAG CITY – Resrespetaren ti Malacañang ti desision ti Sandiganbayan iti panangabsuelto kada Chief Presidential Legal Counsel Juan Ponce Enrile, dati a chief of staff Gigi Reyes ken Janet Lim-Napoles iti kaso a graft mainaig iti kontrobersial a pork barrel scam.
Inbatad ni Presidential Communications Undersecretary Claire Castro, nagsaritan ti korte ken nasken laeng a respetaren ti desision dagiti mahistrado.
Inlawlawagna a daytoy ket pammalagip a nasken a siguradoen a natibker, kumpleto ken naurnos dagiti ebidensia sakbay nga ipila ti aniaman a kaso tapno saan nga agtennag iti kinakurang ti ebidensia dagiti kaso kontra kadagiti maak-akusaran.
Kagiddan daytoy ti posible a panagdudua ti publiko iti integridad ti justice system nangruna ket arig awan pay ti napagsungbat kadagiti dadakkel nga isyu ti korapsion kas ti pork barrel scam.
Inpetteng ti Palasyo, agsina ti bileg ti Ehekutibo ken Hudikatura ken saan a mabalin a makibiang ti Malacañang kadagiti desision ti korte.
Inbalakad ni Castro, mabalin a nairiribuk ti komunidad no saan a respetaren ti desision ti korte.
