LAOAG CITY – Naipasa iti maikadua a pannakaibasana ti Draft City Resolution No. 13SP-2026-244 wenno maysa a resolusion a mangadaptar iti napabaro a Local Cultural lnventory (LCI) ditoy siudad ti Laoag babaen ti Laoag City Culture and the Arts Council ken iti Laoag City Tourism Office ken mangi-endorso met laeng iti National Commission for Culture and the Arts (NCCA) para iti pannakairaman iti Philippine Registry of Cultural Property (PRECUP).
Segun ken ni Sangguniang Panlungsod Member Bjourn Lao, Chairman ti Committee on Tourism ti pannakaparehistro ti kabukbukudan a kultura ken heritage ket napateg unay tapno agtultuloy dagitoy a mapreserbar
Inbatadna a kalikagumda a maammoan no ania dagiti pakabigbigan ti lokal a gobierno babaen kadagitoy.
Inlawlawagna a naruay dagiti kultura ken heritage ditoy siudad ti Laoag pakairamanan dagiti panagaramid ti taraon wenno produkto kas ti insarabasab, dinakdakan, lusay, hi-bol, poki poki, patupat, linapet, busi, pinakbet ken dadduma pay.
Kunana a dagitoy a produkto ket bukud a kukua ti lokal a gobierno isut gapuna a gagemda a mairaman iti Philippine Registry of Cultural Property babaen iti The Intangible Property Category.
Innayonna a babaen kadagitoy nga addang ket maipasigurado ti orihinal a naggapoanan dagitoy a banag.
