LAOAG CITY – Inlungalong ni Bagong Henerasyon Party-list Rep. Robert Nazal nga aramiden a krimen ti panangaramid, ken panangiwaras kadagiti peke a silalamo nga imahe wenno videos, pornograpia pakairamanan dagiti “deepfakes” nga ar-aramiden iti babaen ti artificial intelligence wenno AI.
Naipalaon daytoy iti inpila ni Nazal nga House Bill 807 wenno gakat kas sungbat iti pananggipit ken panangibabain babaen kadagiti peke a silalamo nga imahe, videos wenno pornograpia.
Nadakamat a basar iti rekord ti Philippine National Police ket ngimmato iti 18% ti voyeurism cases idi 2024 idinto a nakairekord met ti National Bureau of Investigation ti 240% a panagngato kadagiti reklamo mainaig iti deepkafe sextortion.
Nakailanad pay iti gakat nga iti panagsukisok ti United Nations Children’s Fund idi 2022 a maysa kadagiti lima nga ubbing a Pilipino nga agtawen ti 12 agingga iti 17 ket nakapasar ti online sexual exploitation wenno panangabuso.
Kabayatanna, no naan-anay a mapagbalin daytoy a linteg, dagiti aglabsing iti daytoy ket mabalin a maibalud iti 12 a tawen agingga iti 20 a tawen no ti biktima ket menor de edad.
