LAOAG CITY – Inpeksa ni Mrs. Maricel Raymundo iti Brgy. 45 Tanguid ditoy siudad ti Laoag ti sakit ti nakem na gapu iti saanna panagsweldo iti cash for work program.
Segun ken ni Raymundo, maysa a lawas a nagdalus da iti barangay da manipod idi Setiembre 14 agingga iti Setiembre 17.
Nu pay kasta, inbatad na nga imbes nga isuda ti makaawat ti 1,275 a pisos a sweldo iti maysa a lawas wenno 255 a pisos iti kada aldaw ket dagiti saan a nagdalus ti immawat.
Immuna iti daytoy, inpakaammo na a saan nga isuda ti adda iti listaan a naipasa iti Office of the Barangay Affairs (OBA) para iti cash for work ken dagiti immawat ti nailista.
Kabayatanna, inbunannag na a nagipasa kadagiti dokumento ngem saan a naisukat iti listaan iti OBA
Innayun ni Raymundo a naiyumanen ti nasao a banag kadagiti opisyal ti barangay.
Iti mainaig a damag, inlawlawag ni Brgy. Kagawad Russel Anacleto nga idi nailista ti nagan dagiti benepisyaryo ti cash for work ket saan a naiyuman iti barangay council.
Inbatad na nga idi nakita ti kapitan ti listaan ket pinabaliwan ti kapitan gapu ta arig a naggapo iti maysa a pamilya ti kaadoan kadagiti benepisyaryo.
Inpasingked na a naiyuman iti PENRO nga adda dagiti nasukatan iti listaan ket immanamong ti nasao nga opisina.
Nu pay kasta, idi dimteng ti aldaw a panagawat ti sweldo ket dagiti saan a nagtrabaho dagiti napan immawat, banag a pagririan dagiti nagubra.
Immuna iti daytoy, inapakaammo ni Anacleto a ti BAPC President iti ti akin iggem iti nasao a programa iti barangay ken dagiti agnagan ti Rodickson Pascual ken Jonathan Bumanglag ti nagipasa ti nagan dagiti benepisyaryo.
Innayun na a saanda nga ekspektaren a ti listaan ket saan a napabaro nu pay naipakaamo dagiti maseknan nga adda ti nasukatan ti naganna.
Kabayatanna, inadmitir ni Macrina Bagay, maysa kadagiti immawat ti sweldo a saan a nakaawat nu pay saan a nagubra iti cash for work.
Nu pay kasta, kuna na nga immuna a nailista ti naganna ngem saan na a masinunuo nu apay a saan nga isuda ti napagdalus iti inawatna a sweldo.
Innayun na a basar iti balakad ni Rodickson Pascual ket ti inawatda a sweldo ket isu ti lattan ti sweldo da nu bilang isuda ti maituding nga agubra.
Nu pay kasta, kuna ni Bagay a sidadaan a mangited ti inawat na a sweldo kadagiti immunan a nagtabaho iti babaen ti cash for work program.
