LAOAG CITY – Inlawlawag ni Atty. Veronica Crisanta Magbual a ti panangbingay ti oras iti trabaho ken panagbasa ti nagbalin a dakkel a karit kenkuana sakbay a nakapasa iti kaliplippas a 2025 Bar Examinations.
Segun kenkuana, pudno a narigat a paggiddanen ti panag-review, panagbasa ken mapan ag-duty kas maysa a kameng ti Bureau of Fire Protection.
Inbatadna a masansan a dua laeng nga oras ti panag-review-na sakbay a sumrek iti Law School no sadinno nga adda dagiti gundaway a saan a makasungbat iti klaseda.
Nupay kasta, inlawlawagna a dakkel a tulong ti panangalana ti study leave tapno naan-anay a makatutuk iti panag-review ken panagbasana iti abogasia.
Kunana a ti nagbalin nga inspirasionna ket ti ina ken asawana tapno ad-adda a magutigot ti riknana a saan a mapukawan ti namnama iti baet ti kinarigat ti eksaminasion.
Mainaig iti daytoy, inpakaammona a nag-first year law student isuna iti Polytechnic University of the Philippines – Santa Mesa idi 2013 agingga iti 2014 ken nagsubli daytoy a nagadal idi 2018 idinto a nagturpos iti Law School idi tawen 2022.
Innayonna a napalaos ti ragsakna idi naammoanna a daytoy ket maysa kadagiti 5,594 a baro nga abugado ditoy pagilian nangruna ket namin-adun a daras daytoy a nangala ti nasao a bar examination.
Naammoan a ni Atty. Veronica Crisanta Magbual ket agdama a Senior Fire Officer 1 ken agserserbi kas bumbero iti Bureau of Fire Protection iti uneg ti 14 a tawen.
