LAOAG CITY – Rinugianen ti imbestigasion iti napasamak a panangdarusdos ti lugan iti maysa a Pinoy street festival idiay Vancouver, Canada a nakatayan ti sumagmamano nga indibidual basar ken ni Canadian Prime Minister Mark Carney.
Adda ti 11 nga indibidual ti kumpirmado a natay iti “Lapu Lapu Day Block Party” idiay Vancouver.
Basar iti Vancouver police iti post-da, inarestarda ti agtawen ti 30 a lalaki manipud iti nasao a lugar nga am-ammoda iti lugar a nakapasamakan ti insidente idi rabii ti Sabado.
Segun kadagiti otoridad, kumpiansada a ti insidente a napasamak ket saan a maysa nga act of terrorism.
Kabayatanna, basar kadagiti saksi, immuna a kinamat ken iniggaman dagiti napan nagatendar iti festival ti nasao a suspek agingga a simmangpet ti pulisia.
Naammoan a naitaray kadagiti nagduduma nga ospital dagiti nasugatan a biktima.
Napasamak ti insidente kalpasan ti alas-8 ti rabii nga asideg iti East 41st Avenue ken Fraser Street no sadinno a maisaysayangkat ti Lapu Lapu Day Block Party.
