LAOAG CITY – Nadismaya ti maysa a private lawyer a ni Atty. Juanito Antonio iti nagbalin a desisyon dagiti 19 a senador a nangi-archive ti articles of impeachment kontra ken ni Vice President Sara Duterte.
Inpetteng na a nalawag nga adda ti inpila ti kamara de representantes a motion for reconsideration isut gapuna a rebbeng koma nga inuray da ti agbalin a desisyon ti Korte Suprema mainaig iti daytoy a banag.
Inpalgak pay ni Atty. Antonio nga inulit-ulit laeng nga inbagbaga dagiti maseknan a kameng ti senado ti rule of Law ken due process.
Ibilang pay ni Atty. Antonio a nakakatkatawa ti inaramid dagiti nadakamat a kameng ti senado gapu ta isuda a mismo a mangdesisyon koma ti impeachment complaint kontra iti bise presidente ti nagpila ti mosyon tapno maibasura ti kaso.
Masdaaw pay ti abogado no apay a nagdardaras dagiti kameng ti senado a nangi-archive ti impeachment complaint kontra iti bise presidente.
Kabayatanna, dinayaw ni Atty. Antonio ni Senate Minority Leader Tito Sotto III gapu iti kinalaing na a nagpalawag kabayatan ti debate iti senado mainaig iti impeachment case kontra ken ni Vice President Duterte.
Kuna na nga uray saan nga abogado ni Sotto ket nadlaw a sinaganaan na a naimbag ti sitwasyon gapu ta uray mismo ni Senador Rodante Marcoleta ket adda dagiti gundaway a saanna a dagus a nasungbatan dagiti saludsud kenkuana ti minority leader.
Maipalagip a 19 a senador ti nagbotos pabor iti pannakai-archive ti articles of impeachment kontra iti bise presidente idinto nga uppat ti nangkontra ken maysa ti nag-abstain a daytoy ket ni Senador Panfilo Lacson.
