LAOAG CITY – Maladingitan ni Magdalo-Partylist Rep. Gary Alejano iti inaramid ni Presidente Rodrigo Duterte a panangikkat ti Pilipinas iti Rome Statute a nangbuwangay ti International Criminal Court (ICC).
Uray ni Alejano ket mamati a mabuteng ni Duterte iti ICC uray kanayun na nga irakrakurak nga awan ti kabuteng na.
Nupay kasta, kuna ni Alejano a saan nga agepekto a dagus ti inrakurak ni Duterte a panagikkat ti Pilipinas iti ICC.
Inlawlawag na nga umabot pay laeng ti makatawen sakbay a naan-anay nga agepekto ti panagikkat ti Pilipinas iti ICC.
Kuna ni Alejano nga uray kalpasan ti makatawen no adda ti narugyan ti ICC nga imbestigaren a kaso ket saan da a mabalin nga isardeng.
Gapu ti daytoy, kuna ni Alejano nga uray nag-withdraw ni Presidente Duterte iti ICC ket saan paylaeng a makaliklik manipod ti sangsangwen na a kaso.
Innayon na nga uray aniapay ti irakrakurak ti presidente ken ti gabinete na ket saan a makaapektar iti ICC.
