LAOAG CITY – Adalen ni Senate Committee on Basic Education Chairman Sherwin Gatchalian ti panangimuntar ti Close Circuit Television wenno CCTV camera iti uneg kadagiti klasrum.
Daytoy ket gapu kadagiti kaso ti bullying ken dagiti kinaranggas a mapaspasamak iti uneg kadagiti klasrum.
Inbatad ni Gatchalian, saan a kabaelan dagiti mangisursuro a bantayan iti kada nga oras dagiti estudianteda isu a napintas nga ideya ti pannakaimuntar ti Close Circuit Television camera kadagiti klasrum.
Naammoan a karaman kadagiti maadal ket ti panangpundo ti Kongreso para iti pannakaimuntar ti Close Circuit Television camera kadagiti klasrum gapu ta mabalin daytoy nga usaren tapno malappedan ti kaso ti bullying.
Kabayatanna, kunana nga adda met dagiti pagadalan ngaa addaan ti Close Circuit Television camera kadagiti klasrumda ngem daytoy ket napili laeng ken depende daytoy kadagiti Local Government Unit.
