LAOAG CITY – Binallaagan ti Commission on Elections (Comelec) dagiti kandidato a plano na ti mangipaay ti libre a pagluganan wenno free rides iti publiko intono bigat, Oktubre 30 a kaaldawan ti Barangay ken Sangguniang elections a mabalin a sumango da iti kaso a vote-buying.
Segun ken ni Commission on Elections Chairman George Garcia, nakairwamanen ti panangipaay ti libre a lugan kadagiti agturong kadagiti pagadalan tapno agbotos isut gapuna a rumbeng a malapdan daytoy.
Inpetteng ni Garcia a ti panangipaay ti libre a pagluganan ket maikonsiderar a vote buying.
Kuna na a ti nasao nga addang ket saan a makabalbaliw iti kayat nga ibotos dagiti botante ngem agresulta daytoy iti pannakasuspenso ti proklamasyon dagiti mangabak a kandidato wenno madiskwalipikar.
Kabayatanna, inbatad ti National Capital Region Police Office nga im-imbestigaren dan dagiti link a maipagarop nga insidente ti panaggatang ti botos iti Barangay ken Sangguniang Kabataan ken dadduma pay nga opisyal, kalpasan ti naiyuswat nga Operation Kontra Bigay iti maysa a warehouse idiay Navotas City.
