LAOAG CITY – Inpakaammo ti Commission on Elections nga imbestigaranda dagiti insidente ti maipagarup a panangipaay ti campaign materials iti special elections para iti 2nd congressional district ti Antipolo.
Basar iti report, adda dagiti babassit a papel nga adda ti nagan ti kandidato a nakaiwarang iti maysa a pagadalan.
Kuna ti maysa a volunteer nga adda ti maysa nga indibidual a mangipapaay kadagitoy iti ruar ti pagadalan.
Maysa a post iti social media ti nag-report a maipagarup a panaglabsing iti eleksion manipud iti kampo ti kandidato no sadinno a dagiti poll watcher ket nakasuot ti ID nga addaan ti nagan ti kandidato a maipawil iti uneg ti polling precinct.
Inbatad ni Commission on Elections Chairman George Garcia a tingitingenda ti kinalawa ti irregularidad ken no daytoy ket “substantial,” adda ti bileg ti Commission on Elections a saan nga iproklamar wenno disqualify ti kandidato agingga a makatugaw iti puesto.
Kuna ni Garcia, nasken nga iraman dagiti reklamo ken insidente iti minutes ti electoral board kas ebidensia.
