LAOAG CITY – Agtultuloy ti panangipadanon ti pannakipagladingit manipud kadagiti nagduduma a dati ken agdama a lider ti pagilian gapu iti pannakatay ni Pope Francis.
Agpapada a panangdayaw ken napalaus a pannakipagladingit ti inpadanon dagiti naruay a lider manipud iti nagduduma a pagilian.
Inawagan dagiti African leaders ti Santo Papa kas boses ti kinakappia ken panagbalin a patas ti amin.
Mainaig iti daytoy, inpadanon ti pannakipagladingit ti dati nga United States President Joe Biden ken dati a Vice President Kamala Harris iti ipupusay ti Santo Papa.
Ibilang ni United Nations Secretary General António Guterres a mangipadpadanon ti namnama ken panagkaykaysa ti Santo Papa.
Kunana nga amin nga empleado ti United Nations ket nagbalin nga inspirasionda ti Santo Papa.
Naammoan nga idiay Estados Unidos ket inbilin ni United States President Donald Trump ti pannakaikabil ti half-mast kadagiti amin a bandera kadagiti pampubliko a pasdek ti Amerika.
