LAOAG CITY – Inlawlawag ni Mr. Marcell Tabije, ti Provincial Local Disaster Risk Reduction Management Officer a ti panangipasa ti Sangguniang Panlalawigan ti maysa a resolusion ti maysa kadagiti requirement para iti panangiparuk-at ti Department of the Interior and Local Government (DILG) iti insentibo nga ipaayda ti probinsia mainaig iti pannakaipasa ti probinsia iti Seal of Good Local Governance (SGLG) iti napalabas a tawen 2023.
Inbatadna nga uppat a milyon a pisos ti insentibo a nailatang nga ipaay ti Department of the Interior and Local Government ditoy Ilocos Norte a gunguna ti probinsia iti pannakaipasana iti Seal of Good Local Governance.
Mainaig iti daytoy, kunana a plano ti probinsia ti gumatang iti dakdakkel a rescue boats ken nayon dagiti kagamitan iti gobierno probinsial.
Mangnamnama ni Tabije nga umanay ti pundo para iti nasao a ganuat ken no adda ti sobrana ket gumatang pay ti probinsia kadagiti nayon a kagamitan para iti Resiliency Office.
Kunana a dua ti immuna a plano a magatang a rescue boats ngem gapu iti nangina a presio dagiti magatgatang ket makita a naimbag no ania ti mabalin a pakausaran ti nasao a pundo.
Inpalgakna a ti kalikagum ti probinsia a magatang ket walo agingga iti sangapulo ti kapasidadna a rescue boat tapno daytoy ti mausar kadagiti naapres a karayan wenno iti baybay kangrunaanna iti pannakaisayangkat ti search and rescue operations wenno para iti pannakaidanon ti relief efforts kadagiti narigat a madanon a lugar nangnangruna ita a panawen ti panagtutudo.
Naammoan nga addaan ti probinsia iti rescue boats nga innem laeng iti kapasidadna a mabalin usaren kadagiti malayus a barangay kas iti maysa a fiber glass pakairamanan ti indonar ti Department of Science and Technology a maysa met laeng a fiber glass ken maysa a rubber boat.
Innayonna a dagiti rubber boats ti probinsia ket naipasidong iti 505 Search and Rescue Squadron iti Laoag International Airport tapno dagitoy ti mangisigurado a napintas ti “maintenance” dagiti nasao a kagamitan.
Kabayatanna, inpakaammo ni Tabije a no addanto pay ti mabati a pundo ket kalikagum ti probinsia ti gumatang iti dakdakkel a drone.
