LAOAG CITY – Inaprubaran ti kamara de representantes iti maikadwa a pannakaibasa na ti nailungalong a pannakaipawil dagiti ubbing nga agtawen ti 13 agpababa nga agaramid ti social media account, ken manglimitar iti panagusar kadagitoy dagiti awan pay iti tawen a 18.
Naaprubaran iti voice vote ti House Bill No. 11566, wenno ti Safe and Friendly Environment for Kids in Digital Spaces Act, no sadinno a napagtitipon ditoy ti nasurok nga 40 a gakat a gagem na a mapaigetan ti panagbantay ti panagusar ti social media dagiti menor de edad.
Daytoy ket kalpasan ti panawagan dagiti otoridad a paigetan ti digital content kalpasan ti nagsasaruno a pammaltog ken pammagkong kadagiti pagadalan a nakairamanan dagiti estudyante.
Gagem dagiti agpanpanday linteg a lapdan ti kinadamsak a ti patien da ket naimpluwensyaan dagitoy ti online content.
Iti babaen ti nailungalong a gakat, dagiti menor de edad nga awan pay ti tawen na a 18 ket maipaayan laeng ti limitado nga access, maprotehiran dagitoy kontra iti narisgo nga ads, livestreaming ken algorithmic short video feed a mangsulisog kadakuada nga ag-scroll nga awan ti panagsardeng da.
Mapatawan ti multa nga agingga iti P5 milyon dagiti platform a manglabsing kadagiti probisyon iti “child-safety,” ken agingga iti P20 milyon no maulit-ulit ti panaglabsing da.
