LAOAG CITY – Nakasaganan ti Senado nga ipasa ti maysa a gakat a gagem a maitantan ti eleksion para iti Barangay ken Sangguniang Kabataan (BSK) 2025 agingga inton 2027 ken maipaayanda ti uppat a tawen a termino.
Basar iti kopya ti Senate Bill 2816 iti maikatlo a pannakaibasana, kalikagum daytoy a mapagbalin nga uppat a tawen ti termino dagiti opisial ti Barangay ken Sangguniang Kabataan ken ikeddeng ti termino ken mabalinda nga agserbi ti tallo nga agsasaruno a termino.
Gagem ti gakat nga itantan ti sumaruno a Barangay ken Sangguniang Kabataan Election manipud iti Disiembre 2025 iti umuna a Lunes ti Oktubre 2027 ken saan nga iti maikadua a Lunes ti Mayo 2029 kas ti immuna a naipadamag.
Mainaig iti daytoy, inbatad ni Sen. Sherwin Gatchalian nga umannugot daytoy ti pannakaiyalud-od ti termino dagiti naelektaran nga opisial ti Barangay ken Sangguniang Kabataan idi October 2023 elections.
Inlawlawagna a saan met daytoy a pabor iti immuna a bersion ti gakat a mangikedkeddeng iti innem a tawen a termino nga adda ti karebbengan pay nga agpa-re-election gapu ta mangitunda daytoy ti at-atiddog a panagakem para kadagiti opisial ti barangay maidasig iti Presidente.
