LAOAG CITY – Inaprobaran ti National Economic and Development Authority ti panangkissay ti 15% iti buis iti bagas para iti in-quota ken out-quota rates agingga 2028.
Inbatad ni National Economic and Development Authority Secretary Arsenio Balisacan, gagem ti addangda ket tapno maipababa ti presio ti bagas ken agbalin nga abot kaya para kadagiti nakukurapay a Pilipino.
Gapu met iti tariff reduction isu a target ti gobierno a maipababa ti presio ti bagas iti P29 iti kada kilo para kadagiti marigrigat ken dadduma pay a benepisiario.
Inpasingked ni Balisacan nga aguray laeng dagiti umili iti mabiit sakbay a marikna ti panagbaba ti presio ti bagas gapu ta mangiparuk-at pay laeng ti executive order ti Presidente no sadino maimpluwensiaan ti desision dagiti pribado a sektor para iti panag-import.
Innayon ni Balisacan a pagtalinaeden ti National Economic and Development Authority Board ti taripa para kadagiti nagduduma a produkto agrikultura kas dagiti asukar, nateng kas ti sibuyas, bawang, brocolli, carrots, cabbage, lettuce, sweet potatoes, cassava, coffee substitutes ken dadduma pay.
Kabayatanna, ti comprehensive tariff review ket maar-aramid iti kada lima a tawen.
