LAOAG CITY – Inpetteng ti Phillipine National Police (PNP) a legal ti panangkumpiskar kadagiti luxury cars nga ikonkonektar ken ni Representative Elizaldy Co.
Daytoy ket kalpasan a kinontra ti kampo ni Co mainaig iti maipagarup nga ilegal ti panangkumpiskar dagiti otoridad kadagiti nadakamat a lugan.
Inbatad ni Acting Phillipine National Police Chief Lt. General Jose Melencio Nartatez Jr., naiwayat ti operasion iti babaen ti bileg ken maipatpatungpal a legal nga otoridad.
Mainaig iti daytoy, inpasingkedna iti publiko nga amin a tignay ti nailian a pulisia ket legal ken maiyallubog iti linteg.
Maipalagip a nakumpiskar dagiti lugan idi nangiwayat ti napagtipon nga operasion ti Phillipine National Police, Bureau of Customs (BOC) ken Land Transportation Office (LTO) iti maysa a condominium building idiay Bonifacio Global City, Taguig City.
Ni Co ket dati nga agpanpanday linteg a maitudtudo a karaman iti imbestigasion ti gobierno mainaig iti maipagarup a flood control anomaly.
