LAOAG CITY – Inbilin ti Sandiganbayan ti panangkumpiskar iti saan a bumaba iti 16 a sanikua ni dati a Congressman Zaldy Co a sumangsango iti kaso a graft mainaig iti maipagarup a substandard a flood control project idiay Oriental Mindoro.
Daytoy ket tapno masigurado ti posible a panagbayad ti P215 milyon a civil liability no bilang mapaneknekan a naglabsing ni Co iti kaso.
Nangiparuk-at ti korte ti pammilin kalpasan a pinatgan ti Ex-Parte Motion for Issuance of Writ of Preliminary Attachment nga inpila dagiti government prosecutor kontra ken ni Co ken ti asawana a ni Mylene Co a mangsakup iti 16 a real estate properties.
Karaman kadagiti sanikua a naipadalan iti seizure order ti pito a daga wenno house and lot idiay Makati City, Pasig City, Lipa City idiay Batangas ken lima a condominium unit idiay Pasig City ken Makati City.
Inlawlawag ti korte nga iti babaen ti Rule 127 ti Rules of Court mainaig iti Provisional Remedies in Criminal Cases, palpalubosan daytoy ti gobierno, kas offended party nga i-attach ti sanikua ti akusado kas seguridad iti aniaman a desision a mabalin nga ipataw ti korte.
