LAOAG CITY – Inpakaammo ti maysa a Private Lawyer a ni Atty. Kidd Castro, Criminal Law Professor ti Northwestern University a posible a maibalud ti innem a bulan agingga 2 a tawen ti asinoman a mapaneknekan a nangpaltog ti aso nga awan ti nadagsen a rason.
Malaksid iti daytoy, mabalin pay a mamulta ti 30 ribu a pisos agingga 100 ribu a pisos ken nakadepende ti kinadagsen iti panaglabsingda iti linteg.
Kunana a saan a rumbeng a paltogan dagiti walang nga aso aglalo no saan met a mangitunda ti peggad iti biag ti maysa a tao.
Inlawlawagna nga adu met ti sabali pay a wagas tapno maliklikan dagitoy imbes a dangran wenno papatayen usar ti paltog.
Inpettengna nga adda ti pagpatinggaan iti panagusar wenno panagikot ti paltog ti maysa nga indibidual.
Binalakadanna pay dagiti gun holders a saan a kasapulan a paltogan dagiti aso tapno laeng maprotektaran ti bagi.
Innayon ni Atty. Castro nga adda met ti responsibilidad dagiti akin-taraken kadagiti aso a baybay-an nga agwalang-walang iti pampubliko a lugar a mangitunda ti risgo kadagiti umili.
Immuna iti daytoy, pinaltogan ti naka-riding in tandem ti maysa nga aso kalpasan a kinamat isuda ti aso kabayatan ti panagdalyasat dagitoy iti kalsada.
