LAOAG CITY – Kalikagom ni Gov. Matthew Marcos-Manotoc a mapapigsa ken maitandudo ti panagdur-as ti industria ti kawayan ditoy probinsya.
Daytoy ti inpakaammo ni Mr. Hashler Garalde, Bamboo Focal person ti Provincial Government of Ilocos Norte, a nupay mangrugi pay laeng a maiyestablisar ditoy probinsia ti “tissue culture” usar ti kawayan ket pinarugianen ti gobernador ti pannakitaripnongna kadagiti manamnama nga agbalin nga investor kas iti “Rizome Philippines”.
Segun ken Garalde, interesado ti nasao a kompania nga agpu-onan no sadinno a kalikagumda pay ti mangipasdek kadagiti pasilidad a pagaramidan ti nagduduma a produkto manipud iti kawayan.
Kunana a daytoy ti mangipasigurado ti nayun a pamastrekan kadagiti umili.
Inbunannagna a nakasagana dagiti maseknan a gumatang kadagiti maaramid a produkto manipud iti kawayan ken adda pay ti posibilidad a mailako dagitoy a produkto iti sabali a pagilian.
Mainaig iti daytoy, inlawlawagna a karaman pay dagiti public areas kadagiti lugar a nabisitan a mabalin a pakaipatakderan dagiti pasilidad.
Gapu iti daytoy, kunana a maisagsaganan ti “tenurial instrument” kadagiti nasao a lugar tapno maipalubos a mapatakderan dagitoy ti pasilidad para iti kawayan.
Kabayatanna, inpakaammo ni Garalde nga addan ti naaprobaran babaen iti Department of Labor and Employment (DOLE) para iti Sustainable Livelihood Program dagiti kakailian nga interesado a sumrek iti industria ti kawayan manipud iti ili a Nueva Era, siudad ti Laoag ken ti siudad ti Batac.
Isuda ti umuna a maipaayan ti tulong agsipud ta dagitoy dagiti gunglo a reshistrado iti DOLE ken iti Securities and Exchange Commission a pasado iti pagalagadan nga inyetnag ti DOLE.
Impalgakna a mangipaay ti DOLE ti agarupo lima gasut a ribu a pisos iti tunggal Local Government Unit para iti maipasdek a pasilidad ken dagiti mausar a kagamitan a mangpaalisto ken mangpapintas kadagiti aramiden dagiti maseknan a produkto manipud iti kawayan.
Iti agdama ket addan dagiti naiyestablisar a pasilidad idiay Brgy. Mabaleng iti siudad ti Batac, Brgy. Balatong iti siudad ti Laoag ken iti Brgy. Ugis ti ili a Nueva Era.
