LAOAG CITY – Inpakaammo ni Engr. JC Vidad a napateg ti panangpili dagiti empleado iti panangipatakder ti negosio.
Inlawlawagna a daytoy ket kalpasan nga adda ti gundaway a pimmanaw amin dagiti empleadona a nangitunda ti dakkel a pannubok kenkuana iti tailoring shop-na.
Inbatadna nga adda ti sumagmamano a bulan ti napalabasen ngem awan pay ti nabirukanna agingga nga adda ti nagaplikar nga empleado kenkuana.
Inlawlawagna nga ibilangna a nagasat ti nasao nga empleado gapu ta sipod idi nangrugi nga agtrabaho iti tailoring shop-na ket nagtultuloy ti panagdur-as ti negosiona.
Kunana nga agpapan ita a gundaway ket agtrabtrabaho pay laeng ti maseknan nga empleado iti tailoring shop-na.
Mainaig iti daytoy, segun ken ni Engr. Vidad a manipud iti bassit ken nailet laeng a puesto ti tailoring shop-na ket nagbalinen a dakkel ken nalawa daytoy.
Naammoan a napanaganan ti Laoag Engineering Designs iti tailoring shop-na gapu ta nagturpos isuna ti kurso nga Engineering.
