LAOAG CITY – Napateg ti panangpili ti lokasion iti panagipatakder iti maysa a negosio.
Segun ken ni Mr. John Marvin Galat a taga Barangay Buttong ditoy siudad ti Laoag, ti panangpili ti napintas a lugar ti maysa kadagiti kapapatgan a banag no sumrek iti maysa a negosio tapno ad-adda a magutigot dagiti kustomer.
Inbatadna nga ubing pay laeng daytoy agingga idi timmapog iti kolehio ket mahilig daytoyen nga agkape isu nga apaman a nagturpos isuna iti panagadal iti kurso a Computer Engineering ket insigida a sinerrekna iti negosio.
Inlawlawagna nga apaman a naglukat daytoy ti maysa a coffee shop ket awan ti kaduana no sadinno nga amin a proseso manipud iti panagtempla ti kape agingga mai-serve kadagiti kustomer ket isuna ti agar-aramid.
Nupay kasta, kunana nga iti panagtulid ti panawen, in-inot nga inarakup dagiti kustomerda ti kape nga ididiayada agingga a pimmigsa ti negosio isu a napanunotanna ti mangalan ti kakaduana tapno adda ti katinnulonganna iti trabahona.
Mainaig iti daytoy, inpakaammona a manarimaan ti pannaki-partnership-na kadagiti local pastries owners ditoy probinsia nga ilaklakona dagiti produktoda iti negosiona.
Innayonna a kalikagumna a makaibati ti napintas a kapadasan dagiti kostumerda a nakaraman ti ipanpannakkelda a naisangsangayan a raman ti kape.
Kabayatanna, naammoan a dimmalan ti umiso a panagsanay dagiti amin nga empleado ni John Marvin pakairamanan isuna tapno ad-adda a maasa ti kabaelanda iti panangi-serve kadagiti produkto nga ilaklakoda.
