LAOAG CITY – Nakaragsakan ni Armed Forces of the Philippines Chief of Staff Gen. Romeo Brawner ti panangpirma iti Philippine-Japan Reciprocal Access Agreement iti nagbaetan da Defense Secretary Gilberto Teodoro ken Japanese Foreign Minister Kamikawa Yoko nga inimatangan mismo ni Presidente Ferdinand Marcos Jr.
Segun ken ni Brawner, saan laeng tapno mapapigsa pay ti military relations ti dua a pagilian no di ket mapagtalinaed pay ti peace and security iti Indo-Pacific region.
Kumpiansa ni Brawner a mangitunda ti napintas a resulta ti Philippine-Japan military relations gapu ta mangipaay ti wagas daytoy iti maysa a joint military exercises, naig-iget a defense cooperation ken mangitunda ti natibker a security relations iti nagbaetan dagiti puersa ti dua a pagilian.
Inpaganetget ti Armed Forces of the Philippines Chief a ti nasao a katulagan ket mangipaneknek iti inkarida a mapagtalinaed ti rules-based international order tapno magun-od ti natalged, nakappia ken progresibo a rehion.
Kabayatanna, nakikaysa met ni Brawner iti naiyuswat a 2+2 meeting iti nagbaetan ti Pilipinas ken Japan.
Kabayatanna, ti nasao a taripnong ket nagmarka ti maysa a napateg nga addang iti panangpapigsa ti relasion ti militar iti nagbaetan dagiti dua a pagilian.
