LAOAG CITY – Inrubuat ti liderato ti Kamara de Representantes ti LegisHear a maysa a public consultation nga iwayat iti intero a pagilian tapno maikkan ti gundaway dagiti umili a maaddaan ti boses iti panangputar ti gakat para iti pagsayaatanda.
Ti seremonia ti panangirubuat ti programa a LegisHear ket indauloan mismo ni House Speaker Faustino Bodgie Dy III a naisayangkat iti Isabela State University, Echague, Isabela.
Inpetteng ni Dy a ti nasao nga inisyatiba ket paset ti gagemda a maiyasideg kadagiti umili ti baro a Kongreso ken ti presensia ti gobierno.
Kunana a nagbalin nga inspirasion ti Kamara de Representantes ditoy dagiti immunan a nationwide consultative meeting kadagiti umili para iti gakat nga Anti-Political Dynasty Bill.
