LAOAG CITY – Inlungalong ni House Committee on Aquaculture and Fisheries Resources Chairman, Representative Brian Raymund Yamsuan a mangputar ti linteg a mangipasigurado ti seguridad para kadagiti babassit a mangngalap.
Gapu iti daytoy, nakitaripnong ni Yamsuan kadagiti key officials ti Bureau of Fisheries and Aquatic Resources (BFAR) tapno talantanen dagiti posible a baro a linteg a mangipasigurado ti proteksion dagiti babassit a mangngalap.
Daytoy nga addang ni Yamsuan ket kageddan ti apela dagiti sumagmamano nga organisasion dagiti mangngalap, Local Government Units (LGUs) ken Civil Society Groups iti First Division ti Supreme Court (SC) tapno ikonsiderar ti ruling a mabalin a mangdalos ti dalan para kadagiti komersial a kompania ti panagkalap a maaddaan ti awan ti makalapped iti panag-access kadagiti municipal waters.
Iti babaen ti Fisheries Code, ti 15-kilometer municipal water zone ket limitado kadagiti babassit a mangngalap.
Inbatad ni Yamsuan ti primary concerns-da ket ti pagbiagan ken seguridad ti agarup 2.5 million a babassit a mangngalap.
