LAOAG CITY – Balligi a naisayangkat ti panangrambak iti maika-60 a Charter Day ditoy siudad ti Laoag ita nga aldaw, Hunio 19.
Segun ken ni Mayor Michaek Marcos Keon, addan ti innem a dekada ti napalabasen sipod a naan-anay a nagbalin a siudad ti Laoag babaen ti bileg ti Republic Act No. 4584.
Inbatadna nga iti uneg ti 60 a tawen ket naruay dagiti napaspasamak a pannubok, problema, panagdur-as ken panagballigi babaen kadagiti dati, agdama ken sumaruno a mangidaulo iti lokal a gobierno.
Inlawlawagna a kas maika-11 a Mayor ditoy siudad ti Laoag ket napateg a selebraran daytoy a naisangsangayan nga aldaw kas panangipaay ti pammigbig kadagiti amin a nagtugaw kas Mayor ken amin a nagserbi nga empleado ti siudad.
Mainaig iti daytoy, binigbig ni Mayor Keon dagiti sakripisio ken tulong dagiti amin nga agpapaay ken nagserbi nga empleado iti naglabas nga innem a dekada.
Kabayatanna, nagatendar iti nasao a programa dagiti sumagmamano nga opisial ti lokal a gobierno kas kada Sangguniang Panlungsod Members Derick Lao, Jamie Fariñas, RJ Fariñas, Jeff Fariñas ken Conrado Respicio.
