LAOAG CITY – Awan ti epekto ti panangnayon ti sarita a ‘wellness’ iti nagan ti Department of Health basar ken ni House Deputy Majority Leader ken dati nga Health Secretary Janette Garin.
Ti sungbat ni Garin ket kalpasan nga inbatad ni Health Secretary Teddy Herbosa a plano daytoy a balbaliwan ti nagan ti Department of Health ken aramiden a Department of Health and Wellness nga idauloan ti Chief Longevity Officer wenno ita ket maaw-awagan ti Health secretary.
Kunana ti panangsukat ti nagan ket mangipasimudaag ti nayon a gastos para iti Department of Health a saan met a mangipakita a sumayaat iti serbisio iti salun-at.
Inlawlawagna a ti nasken a tutukan ti Department of Health ti ngumatngato a kaso ti dengue iti pagilian pakairamanan ti panangpapigsa ti vaccine confidence.
