LAOAG CITY – Sinuportaran ni Senador Christopher “Bong” Go ti temporario nga ipasardeng ti Social Security System (SSS) contribution ita a tawen.
Inbatadna a daytoy ket gapu ta kasapulan a makissayan ti pinansial a parikot dagiti mangmangged ken babassit a negosio iti baet ti agtultuloy a panagngato ti inflation rate.
Ti panagngato ti kontribusion iti 15% manipud iti sueldo dagiti pribado nga empleado ket naisaguday iti babaen ti Republic Act (RA) 11199 wenno ti Social Security Act of 2018.
Inallukoy ni Go ti maseknan nga ahensia ti gobierno nga adalen daytoy a naimbag tapno saan a madagsenan dagiti marigrigat ngem saan a makompromiso dagiti benepisio a mabalinda a namnamaen iti Social Security System.
