LAOAG CITY – Maisayangkat inton Marso 2, 3 ken 4 iti panangrugi ti panangtalan ti House Justice Committee iti uppat nga impeachment complaints kontra ken ni Vice President Sara Duterte.
Segun iti Chairman ti komite a ni Batangas Rep. Gerville Luistro, umuna a tutukanda ti panangtingiting no sufficient in form and substance dagiti reklamo kontra iti Bise Presidente.
Inlawlawag ni Luistro a no makitada nga adda ti form and substance ket isunto ti gundaway a maiwayat ti deliberasion tapno maduktalan no addaan daytoy ti probable cause ken no adda ket itultuloydan iti panagdengngeg uray ag-recess ti session ti Kongreso manipud inton Marso 21 agingga iti Mayo 3.
Gapu iti daytoy, imbitaranda ni Vice President Duterte ngem prerogative daytoy no isuna ket sumango iti panagdengngeg wenno saan.
Dinakamat ni Luistro nga ita a lawas ket ikkandan ti kopya ti uppat a reklamo dagiti miembro ti komite.
