LAOAG CITY – Naisayangkat ti panagtataripnong dagiti pannakabagi ti nagduduma nga ahensya ti gobierno iti opisina ni 1st District Congressman Sandro Marcos tapno matratar dagiti mabalin a solusion ti epekto ti Super El Niño kadagiti umili.
Inpasigurado ti Department of Agriculture ti panangasistir kadagiti mannalon babaen ti short-duration crops kas ti watermelon, sweet corn, ken mungbean.
Malaksid iti daytoy, nagkarida a mangipaay ti early-maturing rice varieties a mabalin nga apiten iti uneg ti 90 nga aldaw ken saan a kasapulan ti adu a danum.
Innayonda pay a bantayanda ken mangipaayda ti tulong kadagiti agtartaraken ti dingwen pakairamanan dagiti mangalap.
Inpasigurado ti Department of Environment and Natural Resources (DENR) a maprotehiran dagiti bantay a posible a pamunganayan ti forest fire ken ti national
irrigation administration a mangipaay dagiti solar-powered pumps, canal clearing ken emergency irrigation repair.
Paigetan met ti Department of Health (DOH) ti panangmonitor ti food ken waterborne illnesses pakairamanan dagiti dadduma pay a sakit a maala gapu ti kinapudot ti panawen kas ti heat stroke.
Babaen ti panagtitinnulong ti Congressional Office of Congressman Sandro Marcos, Office of the Presidential Assistant for Northern Luzon (OPANL), National Youth Commission (NYC), ken ti Liga ng mga Barangay (LnB) – Laoag City, patienda a maiyimplementar dagitoy a ganwat para iti kumunidad.
Dagitoy nga addang ket parte ti panagsagana ken panangliklik ti posible nga epekto ti El Niño.
