LAOAG CITY – Immapela ni Mr. Brigijo Lorenzo, ti presidente ti asosasyon dagiti TADERO ditoy probinsya kadagiti adda iti turay a maisubli ti operasyon ti pallot kadagiti galyera.
Kuna na a daytoy kas met laeng iti maiyus-uswat a panagpallot babaen iti e-sabong nga isu ti agraira iti agdama.
Inbatad ni Lorenzo a para kenkuana ket nasaysayaat nu maisubli ti operasyon ti pallot kadagiti galyera gapu ta adda ti negatibo nga epekto ti e-sabong.
Inpalgak na a karaman ditoy ti pannakairaman dagiti menor de edad a makisali iti e-sabong, banag a saan kuma a rumbeng.
Kuna na a karaman pay ti panagriri dagiti kameng ti pamilya gapu iti e-sabong ken ti panagpakamatay ti sumagmamano.
Inpetteng ni Lorenzo a nu bilang mapalubusan ti pannakaisubli ti operasyon ti pallot kadagiti galyera ket masurot amin a protocols mainaig iti covid-19.
Maipalagip a ditoy probinsya ket saan nga inaprobaran dagiti kameng ti Sangguniang Panlalawigan ti pannakaiyuswat ti electronic sabong wenno e-sabong.
