LAOAG CITY – Nagbalin a narigat ti sitwasyon iti panagadal idi napasaran ti pandemiya gubuay ti covid-19.
Daytoy ti inbatad ni Mr. Limuel Salcedo, residente iti Brgy. 3 iti ili ti Badoc ken nagturpos a cum laude iti kurso a BS Accountancy iti Mariano Marcos State University.
Nu pay kasta, kuna ni Salcedo a saan a ti pandemiya nagbalin a lapped tapno mairaman kadagiti latin honors.
Inbunannag na a nu pay adda dagiti gundaway nga arig a kayat na ti sumuko iti panagadal gapu iti narigat a shifting ti online class ket nagtalinaed a nakired.
Mainaig iti daytoy, inbatad na a saan na met nga inpalubos iti kinarigat ti mangperdi iti panagadal na.
Immuna nga inpakaamo ni Salcedo a nagturpos nga addaan ti dakkel a pammadayaw babaen iti suporta dagiti nagannak kenkuana a maysa a mannalon ken barangay official.
Segun ken ni Salcedo, iti laksid nga adda dagiti gundaway a kayat na ti agtrabaho bayat ti panagadal na tapno masuportaran ti bagbagi na ket saan nga inpalubos ti pamilya na.
Kuna na a daytoy ti pagyamyamanan na gapu ta nu awan ti pamilya a nagbalin a suporta na ket awan ti magun-od na a balligi.
Kabayatanna, inpakaammo ni Salcedo a ti kurso nga accountancy ket isu ti immuna a kayat na nga iturpos idi adda pay laeng iti sekondarya.
Naamoan a ni Salcedo ket inaudi kadagiti tallo nga agkakabsat ken agpapada dagitoy a degree holder.
