LAOAG CITY – Inbatad ni Mr. Jophee dela Cruz Ilaga iti El Nido, Palawan nga agpanpanic-buying dagiti tattao iti lugar da gapu ta saan a makaumanay ti suplay kalpasan ti iduduprak ti bagyo Odette.
Iti interview ti Bombo Radyo Laoag, inlawlawag ni Ilaga nga awan pay laeng ti makaideliver ti suplay a makan iti El Nido gapu iti pannakadadael dagiti kalsada.
Malaksid iti makan, kuna ni Ilaga a nagserra payen dagiti sumagmamano a gasoline station idiay El Nido gapu ta awanen ti ilako da.
Nupay kasta, kuna na a maibaga na nga iti El Nido ti saan unay a napakarwan iti iduduprak ti bagyo Odette no ikompara kadagiti kaparanget da a lugar nga agpapan ita ket saan pay a naisubli ti suplay ti kuryente da ken ti signal ti komunikasyon.
Inpakaammo na nga idi laeng kalman a nagsubli ti signal iti komunikasyon iti lugar da ken ti kuryente ket adda pay laeng ti panagpukaw na gapu ta bassit ti suplay.
Innayon na nga iti iduduprak ti bagyo Odette ket adda dagiti natumba a kayo iti El Nido ken nadadael a pagtaengan ngem awan dagiti naireport a casualties.
