LAOAG CITY – Plano ni Department of Agriculture Secretary Francisco P. Tiu Laurel Jr. a maikkat dagiti brand labels kadagiti imported a bagas kas iti ‘premium’ ken ‘special’.
Patien ti sekretario nga us-usaren laeng dagiti negosiante daytoy a taktika tapno ngumato ti presio ti bagas, nangruna iti retail level.
Inlawlawag ti sekretario a kalpasan ti panangisayangkatda iti konsultasion ken panagbisita kadagiti merkado, natakuatanda a ti panagusar dagiti retailer ken dagiti trader kadagiti nasao a label ket para laeng iti personal nga interes.
Gapu iti daytoy, kunana a nasaysayaat a maikkaten tapno saan a rason ti agtultuloy a panagkusit kadagiti consumer.
Kabayatanna, binallaagan ti sekretario dagiti importer ken traders a makanselar ti importation permit-da no saanda a tungpalen ti regulasion ti pagilian, wenno no maduktalan a mang-sabbotage da iti supply ken pricing ti bagas kadagiti merkado.
