LAOAG CITY – Inpakaammu ti maysa nga opisial ti Intellectual Property Office of the Philippines (IPOPHL) a ti pannakaipasa ti site blocking law ket manglapped kadagiti pirated content ken makatulong iti ekonomia ti pagilian.
Segun kenni Intellectual Property Office of the Philippines Director General Rowel Barba, ti site blocking law ket mangpapigsa iti pananglaban iti piracy, a nabayagen a mangap-apektar iti creative industry ti pagilian.
Iti patta-patta ni Barba, mabalin a maadaan ti maysa a bilyon a dolyar a revenue leakage ti Pilipinas inton tawen 2027 no agtultuloy ti problema iti online piracy.
Segun iti Philippine Statistics Authority (PSA), ti piracy ti mangbukel iti 7.1 a porsiento iti gross domestic product ti pagilian.
Daytoy ket agresulta iti pannakapukaw ti nailian a matgedan ken pagbiagan, ken posible a makastrek ti malware kadagiti devices nga agus-usar kadagiti pirated content nga agresulta iti scamming.
Mainaig iti daytoy, dua a nagduma a gakat ti Senate Bills 2150 ken 2385, ti agdama a naipila iti Senado tapno mabaliwan ti IP code ken maikkat dagiti agdama a limitasion tapno al-alisto a mamonitorda ti electronic ken online content dagiti pirated goods.
