LAOAG CITY – Balligi ti pannaka-irubwat ti Sub-national Competence Center for Health iti Mariano Marcos State University no sadinno a naipatakdek daytoy iti babaen ti panagbinnuligti University of the Philippine Manila ken ti Mariano Marcos State University a pinondoan ti Gesellschaft Fur International Zusammenarbeit wenno (GIZ) iti pagilian a Germany.
Segun ken ni Dr. Nicole Kranz, ti Cluster Coordinator and Principal Adviser ti Deutsche Gesellschaft Fur International Zusammenarbeit iti Germany a ti panggep ti Sub-national Competence Center for Health ket tapno adadda a mapakaammuan dagiti nagduduma a local government units ditoy pagilyan iti agbalbalin nga epekto ti Climate Change.
Kunana a mausar pay daytoy a mangputar iti ordinansa a makatulong iti pagsayaatan dagiti indibidual nangruna iti pannaglimitar ti epekto ti Climate Change.
Innayonna a dakkel a karit ti lubong dagiti agtultulpoy nga epekto ti panagbalbaliw ti klima, saan laeng nga iti biag no di ket agraman iti pagbiagan.
Kabayatanna, pinasingkedan met ni Dr. Eva Maria Cutiongco Dela Paz ti Executive Director ti Institute Of Child Health And Human Development National Institutes of Health iti University of the Philippines – Manila, a basar ti panagadal da iti kallabes ket napaneknekan a gapu ti climate change ket naruay dagiti sakit a mabalin a mapasaran, kas iti dengue, malaria ken panagngato t presion ti dara.
Patien na nga iti babaen ti pannaka-irubwat ti Sub-national Competence Center for Health ket maala amin a datus no siasinno dagiti makapaspasar kadagiti nasao a sakit, no sadinno nga apaman a maeksamen ken maimbestigaran dagitoy ket naipaima ti resukta kadagiti local government units tapno ti kasta ket matulongan da a maliklikan dagiti nasao a sakit.
